GÓP-fréttir: Vísnamál

GÓP-fréttir forsíða	Vísur og ljóð úr ýmsum áttum Hér eru vísur eftir ýmsa höfunda. Þær hafað klifað í hug mér eftir að ég las þær eða heyrði og það friðar sinni mitt að hafa þær hér - en ég hef ekki beðið alla höfundana leyfis að fá að setja þær hér inn. Samt vona ég að enginn fyrtist við. Ef þú sérð villu eða ónákvæmni í uppskriftinni þá vinsamlegast sendu mér línu.
*	Sjá einnig GÓP-vísur af ýmsu tilefni Hver á Ísland? Um ferðafrelsi Íslendinga - þessi síða !! Meiningar um samtímamál - blogg Ofurveruplatið - enn finnast nokkrar ömmur sem eiga við það að glíma Vísur og ljóð úr ýmsum áttum Ættarmóta-söngtextar
Innlegg frá: Anna Sigurkarlsd * JBS * MÓI * SigSig * Gylfi Pálsson	Höfundar: >> Óþekktir höfundar Binna - Bryndís Guðbjartsdóttir BEO - Birgitte - dikt Böðvar Guðlaugsson, kennari Elmar Tómasson Einar Jónsson á Litlu-Drageyri í Skorradal Friðbert Guðmundsson hreppstjóri í Súgandafirði (um 1900) Friðrik Guðni Þórleifsson Guðmundur Gíslason, læknir, f. 1907 - d. 1969 Hallgrímur Jónasson, kennari Haraldur á Jaðri og Halldór Jóhannesson Haraldur Hjálmarsson á Kambi og Sigurhjörtur Pétursson Högni Egilsson - ljóð Jón Helgason og Ólafur Briem um Jónas Hallgrímsson - eða þannig sko - Jón úr Vör Jóhannes úr Kötlum og Kristmann Guðmundsson í Hveragerði Karl T. Sæmundsson, f. 1909 - d. 2004 Katrín Einarsdóttir, móðir Einars Ben. Kári Arnórsson ?? Kristmann Guðmundsson og Jóhannes úr Kötlum í Hveragerði Ólafía Margrét Ólafsdóttir Óli Kr. Jónsson Ólína Jónasdóttir frá Kotum Ómar Ragnarsson fréttamaður Sigurður Nordal - (1886-1974) fræðimaður, rithöfundur og skáld Sigurkarl Stefánsson og Sveinbjörn Sigurjónsson Stefán Jónsson kennari Stefán Stefánsson frá Móskógum Steingrímur í Nesi Steinn Steinarr Steinunn Guðmundsdóttir úr Dölum Svana (SS) Þorvaldur Jakobsson prestur Þorsteinn Erlingsson
>>	Bryndís Guðbjartsdóttir * Aftur í höfundatal
Binna	Jól 1983 Fái allir frið um jól og fylling óska sinna. Hillir undir hærri sól. Hittumst! - Kalli og Binna.
>> Þessar upplýsingar eru úr inngangi minningagreina um Böðvar í Morgunblaðinu 2. sept. 2007.	Böðvar Guðlaugsson, sérkennari, f. 14.2.1922 - d. 16.8.2007 * Aftur í höfundatal Böðvar fæddist á Kolbeinsá í Hrútafirði. Foreldrar hans voru Guðlaugur Jónsson, f. 1.2.1900 - d. 2.8.1976, og Margrét Soffía Ólafsdóttir, f. 25.12. 1895 - d. 28.7.1980. Tvíburasystur hans eru Sigurbjörg Elísabet og Elín Júlíanna f. 14.9.1927. Hann kvæntist 31.1.1958 Ósk Ingibjörgu Eiríksdóttur, ættaðri frá Grjótlæk á Stokkseyri. Börn þeirra eru Unnur, f. 15.10.1954, Þorvaldur Pétur, f. 18.12.1961, Böðvar Már, f. 30.7.1964, og Bergþór Grétar, f. 1.3.1967. Barnabörnin eru 9 og barnabarnabörnin 2. Böðvar átti heima á Kolbeinsá til 8 ára aldurs en fluttist þá til Borðeyrar með fjölskyldunni. Hann ólst upp við mikinn kveðskap og byrjaði ungur að yrkja. Hann stundaði nám við Héraðsskólann á Reykjum í Hrútafirði. Fjölskyldan flutti til Reykjavíkur árið 1942 og hann lauk kennaranámi frá Kennaraskólanum 1946. Eftir Böðvar liggja nokkrar ljóðabækur, barnabók og námsefni. Seinna lauk hann sérkennslunámi og var í hópi þeirra fyrstu sem það gerðu hér á landi. Hann kenndi í Höfðaskóla, Hlíðaskóla og Öskjuhlíðarskóla. Böðvar og Ingibjörg bjuggu lengst af á Borgarholtsbraut í Kópavogi. Í eftirmælum ritar Unnur, dóttir hans, þetta erindi Böðvars: Og hversu dýrðleg útsýn var hér oft er unaðsdegi björtum tók að halla og handan flóans bar við bláhvítt loft í bláum fjarska Snæfellsjökuls skalla. Því hef ég hérna margan dýrðardag dokað við á mínum gönguferðum og dáðst að því hve blómlegt byggðarlag við bæinn okkar, Kópavoginn, gerðum. Og afastelpurnar Eva Dögg og Ellen Björg setja þar uppáhaldsljóð þeirra systra sem afi þeirra orti: Gráttu nú, barn mitt, gráttu eins og þig lystir. Á gólfinu liggja brotin gullin sem þú misstir. Himinbláu augun í heitum tárum fljóta. Góðu börnin gráta er gullin sín þau brjóta. Hlustaðu ekki á tal mitt um hörpudiska og báta, láttu sem þú heyrir ei, haltu áfram að gráta. Heimurinn jafnan hæðir hláturmilda drengi. - Gráttu meira, góði, gráttu heitt og lengi.
Böðvar Guðlaugsson kennari	Ljóð Böðvars eru m.a. í bókum hans: Brosað í kampinn, nokkur skopkvæði og hermiljóð 1956, Heilsubótargrín, grínkveðskapur og gamanþættir 1960, Glott við tönn, Spegilsútgáfan 1966, og Ljóð af tvennum toga. Hann orti einnig í Spegilinn og ljóð hans hafa birst víðar. Hann er löngum glettinn þótt alvaran sé ekki langt í burtu. Böðvar var á Þórsmörk í sumardvöl og gekk í Valahnúknum. Vísan lýsir aðstæðum: Fótasnillin förlast mér - flughál syllan mjóa er! Ekki milli mála fer: maður er illa staddur hér. Þessar elskulegu vísur skildi hann eftir í Skagfjörðsskála á Þórsmörk eitt sumarið (1966-73?): Gott var í Þórsmörk Gísla og Rögnu að finna gestrisni njóta og hvers konar aðhlynning þiggja; dálæti á þeim og landi langfeðra sinna ljómar í augum drengjanna minna þriggja. Stórbrotið umhverfið ævintýri var líkast, árnar, skógurinn, gilin og jökullónin. Í minningum þeirra verður þó vafalaust ríkast hve vinsamleg reyndust þeim blessuð Þórsmerkurhjónin.
>>	Traustatak úr Mbl. vorið 1997: Vöggukvæði á Þorra Sofðu stúfur. Niðdimm nótt að norðan fer. Lát þig dreyma í rökkurrónni riddarann úr öskustónni. Ég skal vaka yfir þér. Búin mjúkri værðarvoð þín vagga er, svo þú megir sofa og dreyma. Sönglaust út í húmið streyma vöggukvæði af vörum mér. Þitt yfirbragð er engilhreint, þín augu snör, mjúkir lokkar yfir enni. Ættarmótið glöggt ég kenni: Rjóðir vangar, róslit vör. Sofðu ugglaus, eg skal vaka yndið mitt. Sigldu draumsins fagra fleyi fram hjá hverjum myrkum degi, uns dagar uppi draumskip þitt.
>>	Traustatak úr Lesbók Mbl. 15.7.2000: Sáðmaður kærleikans Eg, sáðmaður kærleikans, yfirlít akur minn með augum hins starfsglaða manns. Hvert einasta fræ, er eg sáði í þetta sinn, var hið sama og meistarans. Eg fylgdi hans dæmi við allt, sem eg hafðist að. Yfirsjón mín var svo hitt, að mér láðist að búa akur minn undir það að ávaxta fræið mitt. - - - Hvert gagn vinnur frækorn, sem getur ei rætur fest, því garðland er næringarlaust? Eg, sáðmaður kærleikans, óttast uppskerubrest á akri mínum í haust.
Jón Bragi Sigurðsson 3. maí 2005 Sjá líka Steinn Steinar Ítarlegri upplýsingar frá Sigurði Sigurðarsyni 31. jan 2009	Aldrei heyrir maður of mikið af góðum stökum. Varðandi Böðvar Guðlaugsson, þá hef ég lengi kunnað þessa snjöllu vísu sem mér sögð vera eftir hann. 31. jan. 2009 - frá Sigurði Sigurðarsyni: Þetta varðar vísu Böðvars Guðlaugssonar ,,Lotinn standa leit eg mann".. Þannig hefur hún verið skráð í lagboðahefti Kvæðamannafélagsins Iðunnar. Þessi útgáfa er ekki rétt - sagði mér höfundurinn, er ég átti tal við hann fyrir fáum árum. Því miður er hann dáinn og getur ekki borið vitni sjálfur. Hann sagði mér að svona væri vísan rétt: Leit eg standa lotinn mann leysa band af tösku. Þar að vanda hafði hann hálfa landaflösku. Mér er sagt að Böðvar hafi verið 12 ára, þegar hann gerði þessa vísu á Borðeyri, en hún varð strax landfleyg. Ég heyrði líka, um hvern vísan væri, en læt það liggja á milli hluta nú. Bestu kveðjur, Sigurður Sigurðarson dýralæknir
>>	Einar Jónsson á Litlu Drageyri í Skorradal * Aftur í höfundatal
Höf: Einar Jónsson á Litlu- Drageyri í Skorradal	Lagfært í janúar 2009 eftir símatal við Sigurð Sigurðarson, dýralækni. Hann sagði frá samtali sínu við Sveinbjörn Beinteinsson en margir hafa eignað honum vísuna. Sveinbjörn sagði vísuna eftir Einar Jónsson á Litlu Drageyri í Skorradal. Hún er birt í Borgfirskum ljóðum og feðruð Einari. Hún er sennilega eitthvað öðruvísi en hér - og er leiðrétting vel þegin. Einar lá á sjúkrahúsi til aðgerðar nærri nára. Hjúkrunarkonur festu lim hans við fjærlærið. Hann orti: Sjúkrahúsmeyjunum síst mun ég gleyma - sáran mig langaði með þeim í geim. Þær tjóðruðu Grána í túninu heima til þess hann fær'ekk'í blettinn hjá þeim.
>>	Elmar Tómasson * Aftur í höfundatal
Elmar Tómasson	Um þessa vísu segir Karl Th. Sæmundsson 1990: Ég lærði vísuna fyrir mörgum árum og nafn höfundarins - en ég kann ekki frekari skil á honum. Ótalmargt - svo einskisvert - er ég stundum við að glíma. Það besta sem ég gæti gert geri ég aldrei nokkurn tíma.
>>	Friðbert Guðmundsson var hreppstjóri í Súgandafirði - sennilega á fyrsta hluta 20. aldar. * Aftur í höfundatal
Friðbert Guðundsson	Högni Egilsson 2007 segir um Friðbert afa sinn: Hannes Hafstein mætti honum einu sinni í búð þar sem Friðbert var spurður um sína hagi og hann svaraði að i dag drekk ég, á morgun iðrast eg. Hannes gerði þá þessa vísu: Lífið er dýrt dauðinn þess borgun drekkum í dag iðrumst á morgun.
>>	Friðrik Guðni Þórleifsson * Aftur í höfundatal
Spurn! Kanntu lagið ??	Bókasafnið okkar (á Hvolsvelli) Það er fyrir mig, það er fyrir þig, það er fyrir þá sem mennta sig, þar má leita alls, þar má finna flest, það er bókasafnið okkar sem er allra best, þar má myndir sjá, þar má sögur fá, þar er hljómlist til að hlýða á, þar má lesa um skip, þar má læra um hest, það er bókasafnið okkar sem er allra best, fyrir unglinga, fyrir aldraða fyrir ólæsa, fyrir doktora, fyrir heimamann sem og góðan gest, það er bókasafnið okkar sem er allra best.
>>	Guðmundur Gíslason, læknir * Aftur í höfundatal
Guðmundur Gíslason, læknir	Guðrún Gísladóttir hefur eftirfarandi vísu sér í minni - utan fyrstu þrjú orðin sem hér eru setti inn frjálslega. Hún stendur í þeirri trú að vísan sé eftir Guðmund, bróður hennar 1907-1969: Það er leikur, líkt og tafl, léttir skap og styttir tíma - sitt að láta andans afl eitthvað hafa við að glíma. Ef þú kannast við þessa vísu - þá láttu mig vita!
Sigurður Sigurðarson dýralæknir. 4. ágúst 2006 Sjá einnig úr vísnadálki Mbl: 1 - 2	Ein vísa, sem Guðmundur Gíslason læknir, móðurbróðir þinn, gerði um samverkamann okkar á Keldum, Halldór Vigfússon. Þegar Halldór þylur óðinn þagna aðrir við ótæmandi orðasjóðinn, ómælt brjóstvitið. Þann 24. júlí árið 1966 varð Pétur Sumarliðason fimmtugur og var haldið upp á það í Jökulheimum þar sem hann þá starfaði við veðurathuganir. Guðmundur orti af því tilefni: Fimmtíu árin að færa í letur mér finnst of snemmt. Hann má gera betur. En mikið er hvað maðurinn getur, ég meina hann Jökulheima Pétur. Þessi vísa er einnig eftir hann: Það er hollt að elska unga snót, það örvar blóð og hressir geð. Ástin er hin mesta angursbót - einkum þó - til að byrja með.
>>	Hallgrímur Jónasson, kennari * Aftur í höfundatal
Hallgrímur, sá víðförli ferðamaður og hagyrðingur, skrifaði nokkrar bækur og hér er blaðað í bókinni *Á öræfum* sem prentsmiðjan Leiftur gaf út - ártal er ekki tiltekið - en mun vera 1961.	Yfir Kletthálsinn í ágústlok árið 1952 Þetta var fyrsta ferð með bíl yfir Kletthálsinn og gekk ekki alltaf að óskum: Áfram hrekkur, út á hlið, angur rekkum blandar. Sporahlekkjum spyrnir við, spólar, sekkur, strandar. Við Dettifoss Enginn slíkan ægimátt á í strengjum sínum. Þrumumálið himinhátt hæfir krafti þínum. Á öræfasöndum Hvílir auðnin öskugrá yfir hljóðu landi. Aðeins stöku ílustrá upp úr dökkum sandi. Í göngum 1958 Laugast allt í fjalla frið; ferðin sækist innar. Skíma dagsins skrafar við skugga næturinnar. Vísa um hálfan mána: Máni hlær við himintjöld, heldur upp á sjálfur þennan dag og þetta kvöld, þessvegn' er'ann hálfur.
>>	Öræfastökur Bleikri slikju slær á fjöll; slétta, vik og hólar sýnast kvika undir öll aftanbliki sólar. Hallar kveldi. Skuggar skjótt skýjafeldinn stika. hefst í veldi höfug nótt; haugaeldar blika. Hún á greiðum himinvæng heldur leiðar sinnar. Yfir breiðir blakkan væng bungu heiðarinnar. - - Dropar lágir líða hjá lofts í gráu neti, daggarsmáir iða á öldubláum fleti. Í Herðubreiðarlindum Sindra á leiðum sudda ský, sól á heiðum tindum, hún er að greiða haddinn í Herðubreiðarlindum. Gómar vorsins Fjalls við bringu lítil lind lágum syngur rómum. Vorið kringum tó og tind tyllir fingurgómum.
Yfir fjöll og sæ Formála bókarinnar hefur Hallgrímur Jónasson skrifað á annan jóladag 1962.	Á Kili Einhver draugalýsulog leika um jöklarætur. Nú er kalt á Kili - og kannski reimt um nætur. Þó að hauður hylji mjöll; hlaði sköflum saman, ennþá bíður inn við fjöll yndi mitt og gaman. Á Vestfjarðaleiðum Oft á leiðum inn til lands eftir heiðum farnir verða greiðir göngu-manns götusneiðingarnir.
Vísur teknar traustataki úr bókinni Jeppar á fjöllum Ormstunga 1994	Stökur Bungur greiðar, urðir og eyðileiðir breiðar, tungur, heiðar, velli, vog vökur reiðin skeiðar. Fjallahringur blikar blár, bylgju syngja strengir, hjalla, dyngjur, auðnir, ár aka slyngir drengir. Á Dimmafjallgarði Ferðaþráin löngum lokkar, lyftir brá og hugann seiðir, þegar blái bíllinn okkar brunar háar fjallaleiðir. Þar sem firna fjallahringsins fegurð blasir mínum augum finn ég alltaf Íslendingsins eðli djúpt í sál og taugum. Stökur Auðnin hljóða íss og báls árdagsglóðum hlýnar. Landið góða, förum frjáls fjallaslóðir þínar.
Útvarps- tíðindi Nýr flokkur 1. árg. 8. hefti Des. 1952 Ritstjóri Jón úr Vör	Á árinu 1952 var Ferðafélag íslands 25 ára. Á 2. síðu Útvarpstíðindanna er eftirfarandi - undir nafninu: Sindur Hallgrímur Jónasson er löngu þjóðkunnur maður, þótt ekki væri fyrir annað en ferðaþætti sína og stökur. Meðal annars vegna afmælis Ferðafélagsins varð það úr að við bæðum hann um nokkrar vísur. Varð hann góðfúslega við þeim óskum. Á leið inn á öræfi orti Hallgrímur: Við mér blasir auðnin öll yfir bláum heiðum. Enn skal halda inn á fjöll út af troðnum leiðum. Víður hringur auðnar er, ómar kringum glaður, líkt og syngi í sálu mér: - svona yngist maður. Á gömlum slóðum - Er nóttin kemur dul og draumavíð og dagsins önn er liðin hjá um sinn þá hverf ég einatt inn í liðna tíð hins unga drengs - við fjallabæinn sinn. Á Fjórðungssandi er víða dásamleg útsýn um óravíðan hálendisgeiminn, með Vatnajökul, Hágöngur og Tungnafellsjökul í boga austur undan, eins og heyra má í þessari vísu: Hvílir land í boga beygt bak við himinlindir. Geta dauðleg augu eygt öllu fegri myndir?
1925 Útvarps- tíðindi Sindur: Pistillinn er ekki merktur svo hann mun vera saman settur af Jóni úr Vör, ritstjóra Útvarps- tíðinda.	Hallgrímur segir svo frá: - Í fyrrahaust ókum við nokkrir þvert yfir Kjalhraun en brutum bílinn á leiðinni og urðum að dvelja næturlangt þar uppi í Gránunesi þar til bílstjóranum, Guðbrandi Jörundssyni, hafði tekist að tjasla við vagninn. Fyrr um daginn hafði einn förunauta minna tekið krankleik all slæman - og var það nábítur heiftarlegur. Var staðurinn síðan við hann kenndur. Á heimleið í hinum bilaða bíl var vísa þessi gerð - er Kjalvegur hvarf sýnum okkar: Hlær við byggðin hugum stæð hægt þó Brandur aki. Gránunes og Nábítshæð nú er langt að baki. Félagi Hallgríms veiddi í Fiskivötnum silungs-ódrátt einn sem enginn hafði þvílíkan séð og var ætlað að seigur myndi verða undir tönn: Horft var á ´ann, hrifnum augum, hér ég hvergi frásögn ýki. Grímur dró úr djúpsins laugum djöfulinn - í silungs líki. Og til veislu ýmsum bauð 'ann æðr' og lægri heiðursmönnum. Lengi nætur Satan sauð 'ann - seigur var 'ann undir tönnum. Norður við Tungnafellsjökul var Hallgrímur ásamt Guðmundi Jónassyni. Höfðu þeir sullast yfir Köldukvísl og fleiri ár og kvíslar og voru komnir inn í Jökuldal - sem líka er nefndur Nýidalur. Þá varð þessi vísa til: Strengir sungu, geislar glóa, gylla tungu dals: upp að bungu efstu snjóa ókstu klungur fjalls. Hér er svo vísa sem Hallgrímur nefnir: Landið kallar Landið mjallar ljúfa þrá lætur alla finna. Það mun kalla okkur á inn til fjalla sinna.
>>	Haraldur á Jaðri og Halldór Jóhannesson
Jón G. Halldórsson, kennari á Dalvík. Veturinn 1960-61 kenndi hann í Grindavík og nefndi þar þessar vísur	Haraldur á Jaðri yrkir til Valdimars Kristjánssonar sjötugs: Lífsvef sló með lyndisró léttbrýnn hló við elli vel hefur róið veraldarsjó Valdi á Móafelli. Haraldur á Jaðri sendi Halldóri Jóhannessyni vísuna: Tíminn spinnur tálþráð sinn tólum sallafínum - heldur þynnist, Halldór minn, hár á skalla þínum. Halldór svaraði: Þú hefur gleymt - og því er ver - það um dæmi sanna - að skallinn merki aðals er og allra gáfumanna
>>	Haraldur Hjálmarsson * Aftur í höfundatal Kambi Deildardal f.1908 - d.1970 Fæddur á Hofi á Höfðaströnd. Ólst upp í föðurhúsum. Gerðist verslunarmaður í Siglufirði, Reykjavík og Sauðárkróki. Þekktur hagyrðingur. Árið 1992 var gefin út eftir hann bók: Ljóð og lausavísur eða Hagyrðingur af Höfðaströnd. Sjá Vísnasafn Skagfirðinga.
Í Vísnahorni Morgunblaðsins 11.06.'07.	Brennivín er besti matur bragðið góða svíkur eigi eins og hundur fell ég flatur fyrir því á hverjum degi. Sigurhjörtur Pétursson lögfræðingur í Reykjavík f.1917 - d.1971 orti raunar um Harald er hann rakst á hann í hópi Skagfirðinga við drykkju á Hótel Borg, að því er kemur fram í Vísnavef Skgfirðinga: Ekki er þessi fylking frýn, full af viskíþambi: - hani, krummi, hundur, svín - og Haraldur frá Kambi.
>>	Jóhannes úr Kötlum og Kristmann Guðmundsson * Aftur í höfundatal
Úr handraðanum	Jóhannes skáld úr Kötlum og Kristmann skáld Guðmundsson voru nágrannar í Hveragerði og var kunningsskapur með þeim. Einhverju sinni sagði Jóhannes við Kristmann: Lít ég þann sem list kann. Löngum hafa þær kysst hann Kristmann. Svar Kristmanns var svona: Einkum þó vér ötlum að þær fari úr pjötlum í Kötlum.
>>	Jón Helgason og Ólafur Briem tengjast um Jónas Hallgrímsson
Kristján Bersi Ólafsson í Vísnahorni Morgunblaðsins í des. 2007.	Í Vísnahorni Morgunblaðsins í des. 2007 segir: "Kristján Bersi Ólafsson skrifar: Matthías Þórðarson þjóðminjavörður gaf á sínum tíma út heildarsafn með verkum Jónasar Hallgrímssonar ásamt ævisögu hans. Þegar sú bók kom út orti Jón Helgason um hana þessa vísu: Íslensku skáldin ástmey firrt angurmædd súpa á glasi lognast svo útaf lítilsvirt frá lífsins argaþrasi. Um þeirra leiði er ekkert hirt allt er þar kafið grasi. - Síðast er þeirra saga birt samin af Matthíasi. Matthías kom aftur við sögu Jónasar löngu síðar þegar heimflutningur jarðneskra leifa skáldsins komst á dagskrá. Í því máli kom Sigurjón Pétursson á Álafossi einnig mikið við sögu en hann tók kassann með beinunum ófrjálsri hendi og fór með hann norður í Öxnadal. Þá orti Ólafur Briem á Laugarvatni þessa vísu í framhaldi af vísu Jóns: Bjuggu menn engan bautastein bragarins æðsta þjóni. Hvorki bar lauf né heldur grein haugurinn illa gróni. Seinna menn fóru og sóttu hans bein og sendu þau heim að Fróni. Standa þau nú í stofu ein stolin af Sigurjóni."
>>	Jón úr Vör * Aftur í höfundatal
Jón úr Vör	Stökur Ekki þarf að gylla gull gullið verður alltaf bjart og alltaf verður bullið bull þótt búið sé í rímað skart. * * Áritun í Þorpið sem var jólakveðja hans til GÓP 1973: Það sem áður þótti bull og þeytt var beint í sorpið tíminn nýi telur gull - tötrið gamla - Þorpið.
>>	Karl Theodór Sæmundsson * Aftur í höfundatal
Karl T. Sæmundsson húsasmíðameistari, iðnskólakennari og ferðamaður, f: 29.09.1909 d: 15.08.2004	Horft niður á Eyjabakkana Þeir Friðgeir Grímsson höfðu gengið upp Lónsöræfin og átt við að etja ýmsa ferðaerfiðleika og torfær klungur. Friðgeir sagði frá þessari ferð þeirra félaganna á níræðisafmæli Karls. Þegar þeir komust loksins upp á hæstu hæðir og horfðu niður yfir Eyjabakkana hafði Karl mælt fram þessa vísu: Er nú sleppir urð og grjóti eygjum við græna hagana. Nú er það bara niðrí móti næstu fjóra dagana.
Frá Önnu Sigurkarlsd. >> 30. mars 2008	Katrín Einarsdóttir yrkir til sonar síns, Einars Benediktssonar * Aftur í höfundatal
Katrín Einarsdóttir	Ef að þótti þinn er stór þá er von að minn sé nokkur. Sama blóðið er í okkur, dropar tveir en sami sjór.
>>	Kári Arnórsson (??) * Aftur í höfundatal
Gamall miði	Í verkfalli BSRB sem hófst 4. október 1984 og stóð til 30. október - var viðsemjandinn Albert Guðmundsson fjármálaráðherra sem eftir hálfs mánaðar átök hélt á þingi ræðu með niðrandi ummælum um verkfallsfólkið. Eftir ræðuna flaug þessi vísa um - og nefndist Forn húsgangur: Hún er liðin sú tíð minnar trúar á þann tudda sem launafólk púar á, - - annars finnst mér að héðan væri fljótskroppið með'ann í bíltúr austur að Brúará. Í ókunnugs eyra var vísan eignuð Kára Arnórssyni, skólastjóra.
>>	Ólafía Margrét Ólafsdóttir, tónlistarkennari, skáld og Íslands-ferðalangur * Aftur í höfundatal
Ólafía Margrét Ólafsdóttir Frábær tónlistar-, kennslu og texta- vefur hennar er OMO- vefurinn	Sendi þér hérna sýnishorn af mínum ferðavísum. Fararstjóri hafði á orði að nú væri landslagið orðið nokkuð heiðarlegt, þegar við ókum upp á Holtavörðuheiðina. Þá varð mér að orði: Fréttin þótti mörgum merk, mig þó undra hljóti að nú sé Herrans handaverk með heiðarlegra móti. Og hin varð til eftir spekúlasjónir um hvort hann mundi rigna eður ei: Allt mun ganga oss í hag, ekkert gleði skerða því ef hann rignir ekki í dag ætti þurrt að verða.
GÓP- fréttir þakka Ólafíu Margréti fyrir fleiri kvæði - sem að þessu sinni gefa Þórs_ merkur- hug.	Þórsmörk Það er vor í Þórsmörkinni, þýður andblær jöklum frá. Ennþá fæ ég einu sinni Íslands fjalladýrð að sjá. Þar sem ríkir frelsi’ og friður fyllist gleði hjarta manns, lóukvak og lækjarniður láta blítt í eyrum hans. Allt frá Krossár eyðisandi upp á hæsta jökultind augað lítur ævarandi ægitign í hverri mynd. Hér í víðum faðmi fjalla, fjarri borg, við skógarlund, vildi’ ég, sátt við allt og alla, eyða minni hinstu stund.
>>	Séð frá Langadal 14. júli 1982 Ef að létt frá Langadal líður sjónin fráa sérðu fríðan fjallasal faðma heiðið bláa. Tunglið merlar milt, um kvöld, Mýrdalsjökulskalla, þar úr skriðum Krossá köld og kvíslin Tungna falla. Litfara og Molda má milli þeirra líta, framar glæstan Göltinn sjá gráa aura slíta. Gleymist Heiðarhornið vart hátt við jöklabandið. Fálkhöfuð og Folda skart fegra Goðalandið. Útigönguhöfðinn hæst heldur vöku, brattur. En við Bása búa næst Bólfellið og Hattur. Yfir kirkju Álfa hér unir Réttarfellið. Hátindunum upp af er Eyjafjallasvellið. Innsta-Haus við reistan rís Rjúpnafjallið græna. Rétt við Stakk og Steinsholts ís stöðvum för svo væna. Gleymum ekki gömlum sið góða ferð þá endum, kveðjur dalsins verði við Valahnjúki sendum.
>>	Við komu í Mörkina Yndislega Mörkin mín má ég enn þig finna. Uppfylling er ásýnd þín allra drauma minna.
>>	Ágústnótt Þýtur ferskur ágústblær um öræfanna heim. Yfir færist kvöldsins djúpa ró. Rökkurslæðan breiðist yfir heiðan himingeim, heitir öllum næturinnar fró. En meðan sofa mannabörn máni' og stjörnur sjá á næturhimni norðurljósin neistaflugi slá. Himnaljósin fylla birtu háan jöklasal. Hríslast um mig gleði lífsins skjótt. Ævintýraljóma bregður yfir fjöll og dal. Aldrei leit ég fegri ágústnótt.
>>	Óli Kr. Jónsson, skólastjóri * Aftur í höfundatal
Óli Kr. Jónsson	Óli Kr. Jónsson var skólastjóri Kópavogsskólans 1977 - 1990. Hann fæddist 21.09.1925 á Galtahrygg við Djúp og dó vorið 2004. Fáeinar vísur eftir Óla Kr. er að finna í frásögn Þóris Sigurðssonar af ferð FKE til Lillehammer í júní 2002. Engi, dalir ylinn fá eftir svalar nætur. Vetrardvali víkur frá - vorið skal á fætur. Blómin vallar blikna, falla, beygir þallir norðanátt. Hvítur allur faldur fjalla, fer að halla sumri brátt. Á spilakvöldi Félags kennara á eftirlaunum: Auðunn Bragi er í lagi átta slagi fær hann nú. Er sá frægi andans gæi enn að fægja heilabú.
Frá Önnu Sigurkarlsd. 30. mars 2008	Ólína Jónasdóttir frá Kotum í Skagafirði. * Aftur í höfundatal Systir Hallgríms Jónassonar og þeirra bræðra.
Ólína Jónasdóttir	Ég í steini bundin bý, bási meinaþröngum. Geisla hreina á þó í andans leynigöngum.
>>	Ómar Ragnarsson - fréttamaður * Aftur í höfundatal
Jón G. Halldórsson, kennari á Dalvík. Veturinn 1960-61 kenndi hann í Grindavík og nefndi þar þessar vísur	Ómar Ragnarsson spaugar um orðalag dánartilkynninga og sér fyrir sér tilkynninguna um sitt eigið andlát: Gamli Ómar gaf upp önd í gær - það vottorð sanna. Hann andaðist fyrir okkar hönd og annarra vandamanna. Ómar Ragnarsson setti saman þessa stöku um áhrifamátt þvottaefnisins Sparr við erfiðar kringumstæður: Skálmar ég skók á skítugri brók. Þefurinn þvarr - ég þvoði úr SPARR.
>>	Sigurður Nordal * Aftur í höfundatal F. 14. september 1886 – d. 21. september 1974 Íslenskur fræðimaður, rithöfundur og skáld.
Jan 2011 Heyrt í Sundlaug Kópavogs	Yfir flúðir auðnu og meins elfur lífsins streymir, sjaldan verður ósinn eins og uppsprettuna dreymir.
>> Aftur í höfundatal	Sigurkarl Stefánsson kennari við MR Sveinbjörn Sigurjónsson íslenskukennari í Ingimarsskólanum og seinna skólastjóri í Gagnfræðaskóla Austurbæjar.
10. mars ´08 Sendi þér hér með hið rétta um stafsetningar- vísurnar frægu eftir föður minn og Sveinbjörn Sigurjónsson. Bestu kveðjur. Anna Sigurkarlsdóttir Skráð eftir minni 2004. A.S. Sjá einnig frá Önnu: 1 - Katrín Einarsd 2 - Ólína Jónasd 3 - Óþekktur höf	Réttritunarvísur Eftir Sveinbjörn Sigurjónsson íslenskukennara í Ingimarsskólanum og seinna skólastjóra í Gagnfræðaskóla Austurbæjar. Fyrsta og seinasta vísan eftir Sigurkarl Stefánsson. Notað í stíla 1941-43. Sigurkarl: Yxu víur ef ég hnigi og önd mín smygi í himininn, út af því að það var lygi að Þráinn flygi á Skarphéðin. Sveinbjörn: Tíu kríur tína víur á túni nýja ráðherrans Eta slý og angalíur alveg rýja landið hans. Hafið egndi unga drengi ei þótt lygndi sigldu þeir. Engu gegndu ærið lengi alltaf rigndi meir og meir. Seint um daginn eygja eyju Óðar lægja þanda voð. Taka lagið beygja beygju í bátalægið skríður gnoð. Röskar meyjar raka teiginn rjóðar sveigja lipra hönd. Bóndi heyin bindur feginn brosa slegin engjalönd. Sigurkarl (ortografísk sléttubönd): Tæmast hirslur, björgin bregst, birgir geisla hríðin Dæmast gíslar, skálmin skekst. Skálkar beisla lýðinn. sem snýst við þannig: Lýðinn beisla skálkar, skekst skálmin, gíslar dæmast. Hríðin geisla birgir, bregst björgin, hirslur tæmast. Í Skímu - málgagni móðurmálskennara 6. árg. 2. tbl. 1983, hefur Þórður Helgason cand. mag. fengið þessar vísur hjá pabba og haft þær eftir honum. Fyrirsögnin er: Ortografiskar vísur. Pabbi (Sigurkarl) hóf stafsetningaleikinn með vísunni: Yxu víur...... Síðan tók Sveinbjörn við, orti næstu fjórar og pabbi lauk leiknum með þeirri sem kallast ortografisk sléttubönd: Tæmast hirslur... Eins og lesa má var það ekki létt verk fyrir byrjendur í Gagnfræðaskóla að takast á við stafsetninguna. En ég lenti einmitt í þessu uppáhaldsverkefni þeirra félaga. Nú er allt breytt og virðist hver mega skrifa eins og hann vill!!!!!!!
25. feb. '05 Hér var vísa Sigurkarls en Magnús Óskar Ingvarsson kennari sendi inn leiðréttingu - sem Anna Sigurkarls betrumbætti - sjá ofar en hér er bréf hans í heild >>>	* * * Vísa Sigurkarls Stefánssonar er ekki alveg rétt hjá þér, en þó er lítið að henni. Sagan segir að íslenskukennarar í MR hafi verið að vandræðast með að þá vantaði stafsetningarverkefni og heyrði Sigurkarl, sem var stærðfræðikennari, á tal þeirra. Bauðst hann til að bæta úr skortinum og kastaði fram vísunni: Yxu víur ef ég hnigi - (sjá fyrstu réttritunarvísuna innsenda frá Önnu Sigurkarlsdóttur - hér fyrir ofan!) Sonur Sigurkarls heitir Gísli. Hann er lögfræðingur, en kenndi stærðfræði með mér í nokkur ár. Hann vinnur nú sem fulltrúi hjá Lánasjóði starfsmanna ríkisins. Hann fór oft með eftirfarandi vísu á morgnana, en mér er ekki ljóst hver er höfundurinn: Látum ekki börnin bíða, búinn er þeim sálarhor: tímanum er tamt að líða, troðum í þau fram á vor. (Þetta passar víst við lagið: Ó, þá náð að eiga Jesúm) En ég var að leita á netinu að frænku minni, henni Bryndísi Guðbjartsdóttur, þegar ég rambaði inn á vefinn þinn vegna þessarar skemmtilegu jólavísu eftir hana, sem ég hef aldrei séð áður. Takk fyrir þetta!
>>	Stefán Jónsson kennari * Aftur í höfundatal
Pétur Sumarliðason kennari	Stefán Jónsson, kennari og rithöfundur, og Pétur Sumarliðason (d. 1981), kennari, voru um langan aldur samkennarar við Austurbæjarskólann. Eitt vorið segir Pétur frá því að hann hefur að morgni verið lítt ræðinn og svarað einhverri spurningu samkennara með því að hann vissi ekki neitt um neitt. Þegar þeir ganga út af kennarastofunni inn í næstu kennslustund gaukar Stefán að honum blaði með þessari vísu: Mér er orðið lífið leitt og langur þessi vetur, ég veit ekki neitt um neitt - nema: ég heiti Pétur. Öðru sinni hafði Pétur kennt bekk reikning í forföllum kennara - sem raunar hét ekki Þrúður en verður lagað strax og athugasemd berst. Kennarinn taldi að Pétur hefði eyðilagt alla áætlun sína um kennslu deilingar í stærðfræði. Þetta varð nokkurt hávaðamál - og þá orti Stefán: Allt sem Þrúður átti heilt eyðilagði Pétur og nú verður deilt og deilt deilt í allan vetur.
>> Aftur í höfundatal	Stefán Stefánsson frá Móskógum á Bökkum í Vestur-Fljótum
Leiðrétting 10.11.2009 Með góðri kveðju, frá Gylfa Pálssyni Sjá hér einnig frá Gylfa	10. nóvember 2009 frá Gylfa Pálssyni: Hér er sagt að Við skulum ekki hafa hátt sé eftir Egil Jónasson og Steingrím í Nesi. Ég lærði vísuna í Skagafirði fyrir um 55 árum þannig: Við skulum ekki hafa hátt, hér er ein að vappa. Sumir hafa allt sitt átt innan gæsalappa. Þá var mér sagt að Stefán Stefánsson frá Móskógum á Bökkum í Vestur-Fljótum hefði ort hana á Hótel Hvanneyri þar sem hann sat við glugga ásamt félögum sínum þegar kona/stúlka gekk framhjá og sessunautar hans dylgjuðu um að hún væri óþarflega greiðug og nefndu gæs í því sambandi. Það fylgdi sögunni að heyrst hafi "gutl á pela" hjá þeim kumpánum - þeir fengið sér smávegis út í kaffið; sbr. vísu Stefáns Sannleikann ég segi þér sem ei þarf að fela: alveg vita vonlaust er að venja mig af „pela“.
>>	Steingrímur í Nesi * Aftur í höfundatal Steingrímur Sigurgeir Baldvinsson 1883 - 1968, bóndi í Nesi frá 1919 og kennari í Aðaldælaskólahéraði frá 1949. Heim.: Kennaratal á Íslandi, 1988.
Gylfi Pálsson 3. des. 2009 kl. 21:31 segir >> Góð frænd- semis- kveðja, - GP	Af því að ég svipti þig vísubroti eftir Steingrím í Nesi í Aðaldal um daginn sendi ég þér þrjár snilldarvísur eftir skáldið, þú getur birt þær ef þú villt: Hér við Laxár hörpuslátt harmi er létt að gleyma. Ég hef, finnst mér, aldrei átt annars staðar heima. Þegar stríkkar stangartaumur, stöngin svignar, hjólið malar, þýtur um æðar þungur straumur, þanin taug við laxinn hjalar. * * Fiskur er ég á færi í lífsins hyl, fyrr en varir kraftar mínir dvína. Djarfleg vörn mín dugar ekki til, dauðinn missir aldrei fiska sína. Sagt er að seinasta vísan hafi fundist á náttborði Steingríms að honum látnum.
>>	Steinn Steinarr Aðalsteinn Kristmundsson 1908-1958 * Aftur í höfundatal
Jón Bragi Sigurðsson 3. maí 2005 Sjá líka Böðvar Guðlaugsson,	Sælir og takk fyrir góða síðu. Aldrei heyrir maður of mikið af góðum stökum. Hallgrímur Jónasson og Steinn Steinarr fóru í fræga ferð til Sovétríkjanna á sjötta áratugnum, nánar tiltekið 1956. Þótti Steini nóg um yrkingar og fjallarómantík Hallgríms og orti: Hnígur sól um hlíð og dal hnussar í gjám og skorum þegar Hallgríms mærðarmal mæðir á hlustum vorum. Þá stríddi hann honum óspart með rússneska fararstjóranum sem Galína hét og eina nóttina taldi hann þau vera komin í eina sæng: Hallgrímur sá herjans kall holdsins syngur messu. Séð hef ég margra syndafall en samt er ég hissa á þessu. Bestu kveðjur - Jón Bragi Sigurðsson (Strandamaður búsettur í Svíþjóð)
Úr Vísnahorni Morgunblaðsins PeBl@mbl.is 2008	"Guðmundur B. Guðmundsson rifjar upp í tengslum við hundrað ára afmæli Steins Steinars afmæliskvæði sem Steinn færði vini sínum Guðmundi Sigurðssyni. "Því miður er handritið ódagsett en Guðmundur var fæddur 27. febr. 1912. Mér er ekki kunnugt um að kvæðið hafi birst áður"." Afmælis ég óðinn dikta undir Góu- daufri sól. Leiðist mér við ljóð að fikta, lítið fékk ég af því hól, fáa léttar veit ég vikta vegligum í Bragastól. Sína skyldu samt má gera. Sit þú heill að hverri skál! Gakk á svig við frost og frera - freisti hvorki synd né tál. Ódrykk skal þér enginn bera. - Ölvaður í bæði mál. Leggi gæfan langa planka lækinn yfir hvar þú fer svo þú hvorki sál né skanka svínir út í veröld hér. Sérhver skuld við sjóð og banka sjálfkvitt brosi móti þér. Blessist æ þitt hús og hagur Herrans undir fingurgóm. Allur sé þinn ævidagur upp dubbaður - laus við gróm. Þú sért hvorki þurr né magur. - þín sé Bókin aldrei tóm.
Úr Lesbók Morgunblaðsins 2008	"Ensk þýðing á ljóði Steins Steinarrr: Undirskrift féll niður við birtingu greinar Jóns Óttars Ragnarssonar, Öld Steins er runnin upp, í síðustu Lesbók. Þýðingin er eftir Jón Óttar." Undirskrift Lesendum þessarar bókar, ef einhverjir eru, hef ég ekkert fleira að segja í raun og veru. Sjá, hér er ég sjálfur - og þetta er allur minn auður, hið eina sem ég hef að bjóða lifandi og dauður. Ég veit að þið teljið mig aldrei í ykkar hópi og ætlið mig skringilegt sambland af fanti og glópi. Ég er langt að kominn úr heimkynnum niðdimmrar nætur, og niður í myrkursins djúp liggja enn mínar rætur. Ég ber þess að sjálfsögði ævilangt óbrigðult merki, því örlög hvers manns gefa lit sinn og hljóm sinn í verki: Það var lítið um dýrðir og næsta naumt fyrir andann. Mitt nafn er Steinn Steinarr, skáld. Ég kveðst á við fjandann. Signature To the readers of this book, if any exist, Nothing else I can tell, - nothing else I can list. This is all that I am, the harvest of my strife, The only thing I offer, dead or alive. I know you will never count me as one of your class, And conclude instead - I am either a thug or an ass. I have come afar from a dim and a dreary place And into the depths of darkness my roots are traced. I will - no doubt - be doomed for the rest of my life, 'Cause destiny marks and colors the works we contrive. The times were sparse for the spirit on every level. Steinn Steinarr the poet's my name. I rap with the devil.
>>	Steinunn Guðmundsdóttir úr Dölum, fóstra Steins Steinarrs * Aftur í höfundatal
Vísnaþáttur Mbl. 28.06.2006 hefur eftir Sigurði Sigurðarsyni dýralækni:	Fann ég eigi orðin þá er ég segja vildi, var þó fegin eftir á að ég þegja skyldi.
>>	Svana * Aftur í höfundatal
Svana (SS)	1981 - vísa sem lesa má lárétt og lóðrétt: Böli vínið veldur gjarnan. Vínið marga gleði fyllir, veldur gleði, göfgar andann. Gjarnan fyllir andann snilli. Lárétta og lóðrétta skokk - vísan: Alltaf skokkið skapið léttir. Skokkið minnkar, lagar spikið skapið lagar, lífið bætir, léttir spikið. Bætir mikið!
>>	Þorvaldur Jakobsson prestur fór með þessa vísu þegar hann var krossaður. * Aftur í höfundatal
Vísnaþáttur Mbl. 28.06.2006 hefur eftir Sigurði Sigurðarsyni dýralækni:	Fálkatyrðill fenginn er feikna virðing telst mér það svarið yrði erfitt mér ef þú spyrðir fyrir hvað.
>>	Þorsteinn Erlingsson * Aftur í höfundatal
Úr Vísnahorni Morgunblaðsins PeBl@mbl.is 17. sept. 2008	"Í vísnasafni afa míns, Lárusar H. Blöndals, bókavarðar, er ódagsettur miði með vísu eftir Þorstein Erlingsson. Undir henni stendur með rithönd Lárusar: "Þórunn Sigfúsdóttir, bróðurdóttir Páls í Árkvörn. Vísan aldrei prentuð"." Þökk fyrir vina bros á brá best er að vera kátur. Gott er á meðan Árkvörn á okkar gleðihlátur.
>>	Önnur vers - Óþekktir höfundar * Aftur í höfundatal
Frá Önnu Sigurkarlsd. >> 30. mars 2008	Vísukorn sem kona á Mýrum endar bréf til vinkonu sinnar með. Áður en bréfið endað hef ætla ég þess að minnast að gott er símtal, betra er bréf, - best er þó: að finnast.
Ágúst 2010 Heyrt í Sundlaug Kópavogs	Margt sér temur Adams ætt af því sem er bannað: í Betlehem er barn oss fætt - bráðum kemur annað.

efst á þessa síðu * Forsíða