Dráttur fyrri tíma

Tré í hrauni

Áður fyrr var vegurinn norður frá Galtalæk víða niðurgrafinn og lyftist ekki hátt til útsýnis. Þá bar trén í Drætti við undirfjöll Heklu í austri þar sem þau í nokkurri fjarlægð tosuðust upp úr hrauninu.

Þegar nær dró

Afleggjari var frá veginum austur í Drátt. Þegar þangað var komið opnuðust víðáttumiklir lundir og skógarsvæði sem teygði sig niður að Rangá. Þarna var skjólgott og iðjagrænir grasvellir sem unun var að leggjast í þegar komið var ofan af öræfunum – eða á leið til fjalla.

Friður

Í Drætti var friður og ró. Þeir sem hingað komu með tjald sitt og nesti áttu sumarsælar stundir og börnin léku sér í skóginum og unglingarnir líka á bökkum Rangárinnar. Það eru þessir ómetanlegu eiginleikar staðarins sem hafa gert hann að fjölsóttu útihátíðarsvæði sem fyllist af fólki í ágústbyrjun ár hvert.